第六十四集
特技魔幻藝術

細漢的時陣只要講著李棠華，第一个想著的是啥物？跳火箍、軟骨功、孤輪車？抑是人體疊羅漢？毋管咱想的是不是仝款，特技是一个用身體和道具結合，展現人體無限可能的技法。

特技表演有真懸的風險，無論是落雨抑是大日頭，每一擺攏是拚命演出，只要台跤的觀眾歡喜，怹就愈拚勢表演。隸屬於台灣戲曲學院的「臺灣特技團」的團員，真濟攏是對國小五年仔開始，毋驚透風、落雨的早功訓鍊，怹對國家予怹的責任，有真大的使命感。特技，是怹的夢想，更加是性命的一部份。

2020年是「臺灣特技團」成立的第三十个年頭，佇排滿的表演行程內底，煞予怹無時間冷靜思考。因為疫情的關係，佇2020年這一年通好好歇睏、好好調整。若準有時間，怹攏會排除萬難，排演這檔十年來的大戲「Unknown Aurora-魔幻森林online」，融合傳統特技佮現代舞蹈，閣加入上時行的現代科技，到底這是一个啥物款的故事呢？咱鬥陣來看覓。