第五十二集
快樂農夫

做穡是一件足辛苦的代誌，毋過佇遮的高雄農民身上看袂著「忝」的影跡，看著的只是辛苦了後甜蜜的笑容佮結滿滿的果子。這陣農民朋友有一个共同特色，怹袂怨天怨地，將艱苦當作上天的挑戰，食苦當食補，樂觀面對每一个難關。

這陣快樂做穡人雖然轉來的理由攏仝款，轉來繼承厝內的事業，怹毋是干焦欲做一个做穡人爾爾，有機米農民陳毅鴻有另外一个稱號叫「米神老師」，伊參學校合作，對苗仔栽到收成，逐禮拜替囡仔上課，從小學三年仔學起，囡仔雖然會喊忝，重點是佇過程中，予囡仔有惜福惜食的觀念。

愛講笑閣活跳的時計果園陳德冠家己製作笑詼的影片，刺激逐家的目睭閣雙耳，參朋友做伙合作拍影片，想要成做一个予人記牢牢的青農YouTuber；發佇在六龜山上的台灣原生山茶，何佳薇翁某對頭開始學習，盡心盡力照顧五座茶園，閣將祖厝改做無煩無腦、一切靜好的茶坊，讓人客來遮會當享受生活。

三代賣冰的江淑媛綴阿爸的腳步擔起超過一甲子的冰果店，爸仔囝答喙答規工、逐工無閒刺刺，嘛堅持用台灣著時的果子來做傳統口味的冰；什麼是快樂的放山雞？玉山山脈尾，黃啟洋參阿爸用草藥飼雞，為著予遮的雞身體健康，袂破病的雞才是怹表示的靈魂食材，除了這以外閣加入新科技予飼雞會使閣較輕鬆；佇美濃有一對將做穡當作練身體的翁仔某，羅元鴻佮蔡佳蓉，共地景藝術和農業結合，毋但產生經濟效益，閣會當成做逐家入去放鬆的休閒空間。

傳統農業加入少年人的創意，予食物有新的定義，毋管是新的包裝、新的行銷，顛倒予人閣較了解食物的源頭，佮堅持的原因，透過網路、透過標示，知影家己食的食物是安全的，是有機的，尤其是背後的故事參食物仝款，予人想欲繼續了解。逐家若是有閒來到高雄行踏，會使來揣遮的快樂做穡人，佮怹交流做朋友，聽故事、啉好茶、食好食物，享受體驗台灣新農業的快樂精神。