第四十八集
彩虹海濱開學校

台灣是一个溫暖又閣包容的所在，所以這馬真濟少年人，願意共自己的未來投資佇社區內底，做一寡穡頭，親像佇基隆就有一陣誠少年的朋友，怹開一間學校，逐禮拜開課，邀請想欲了解基隆的朋友來上課。

星濱山團隊的發起人林書豪佮伊這陣朋友，希望用藝術的形式行入社區，共在地的故事佮文化，用足濟趣味的課程，予來參加的人會當輕鬆了解基隆的人情世事。遮的上課方式不是予你一直坐佇教室內底，是欲予你行出去外口，看基隆的風景猶閣了解在地的故事；當然，你若不想欲曝日，嘛有足濟gâu人的手工藝課程會當選擇。

怹自成立到今干焦短短三年，就已經辦過足濟場藝術活動，共正濱漁港的特色加入創作裡，甚至閣邀請在地居民提供故事，共同創作一部逐格動畫「大碗之港」，講過去正濱漁港當興的風景。也因為按呢予團隊成員葉雨涵，決心回去到家己的家鄉七堵開美術工作室，佮當地居民創作「阿爸的船」尪仔冊佮動畫，展現過去洗煤炭的歷史記持，也那教囡仔共家己愛藝術的初衷揣倒轉來。

星濱山團隊的特色就親像正濱的虹厝仝款，顯目，予人流連忘返；也親像基隆的天氣，佇雺霧中也會使看無仝的風景，怹創造出人佮土地黏牢牢的機會，佇遮發生的逐項代誌，攏會當揣出新的生活記持。佇這座浪漫的雨都城市，生活的步調誠慢，你若想欲更較深入了解這个所在，會當來遮打工換宿，做民宿助手；若是干焦想欲歇一時仔，也會當參加在地導覽佮手工藝課程，享受佮體驗濟濟面貌的基隆喔！