第四十四集
耕耘孩子的未來

台中后里有世界出名的薩克斯風，閣有百年糖廠文化參台灣有名的馬仔場，但是煞真少人注意著遮弱勢家庭的囡仔。遮的囡仔不是單親家庭就是阿公阿嬤咧tshua7，有的是外籍的爸仔母抑是家長坐監的關係，怹無法度看顧囡仔的課業，經濟上嘛無才調予囡仔有其他的學習機會，為著無愛予遮的囡仔佇這款環境循環，長期投身社會服務的黃仁祈，利用過去的資源相招真濟仝理念的少年伴，運用自己的專才投入偏鄉教育的工課，為著予囡仔有閣較多元的學習機會，怹除了輔導囡仔課業以外，嘛引入各種培力的課程，一方面培養囡仔的興趣，另外一方面嘛加強囡仔的生活技術，同時怹嘛會邀請台灣佮世界各地的志工，來后里體驗當地的生活，毋但會當有國際交流，嘛予志工參囡仔有互相學習的機會，因為怹想欲證明，偏鄉的囡仔嘛有追求夢想的權利，偏鄉的囡仔嘛有能力改變家己的運命。