第四十一集
東北角的排球魂

講到運動，逐家頭先會想著啥物咧？臺灣的國球—野球？抑是NBA籃球？在臺北世大運的賽事過程當中，看著真濟臺灣選手拚命的精神，不管是運動埕頂的走相逐，抑是無啥人知的滑輪溜冰拚破紀錄，原來咱有遮濟有才情的運動選手，在競技比賽背後，是按怎的辛苦練習才有遐爾好的成績？

相對的，排球運動佇臺灣的運動賽事內，毋是一个予人關心的運動，閣加上真濟庄跤所在猶是資源欠缺的球隊，成立到今攏無啥人知，佇咧臺灣東北角的瑞芳高工排球隊，就是一个按呢的球隊，成立到今十三冬，是到2019年得到高中排球甲級聯賽亞軍，才予人知影怹本底無人知的故事。

球隊在光頭教練邱得全佮葉怡君教練的tshua7領之下，除了老師講會使放假的時間，瑞工小將逐工透早六點起床，八點到十點練球做球員，十點了後閣轉換作認真上課努力學習的好學生，下晡三點一來到又開始練到五點，暗時留佇咧學校暗自習，比一般學生辛苦真濟。

只要有機會，就會征戰大大細細的排球比賽，累積實力。邱老師捌算過，排球隊的囡仔自一年仔開始到三年，怹比賽的路程有兩萬公里遐長。問怹有忝無？怹真精神的講袂，閣講到真歡喜。

乎對手打敗就趕緊peh起來，就算輸矣猶是愛提出態度和精神，和對手講多謝，全隊26人來自無仝的家庭佮學校，逐工24點鐘攏作伙，怹是愛按怎提出上好的團隊默契，作伙拚入去排球上懸殿堂，再續東北角奇蹟咧？