第四十集
苑裡掀海風

因為一場反風車的社會運動，林秀芃、劉育育兩个佇無仝生活背景大漢的少年人，看著苑裡這个庄跤所在，嘛予怹決定欲留佇遮。

為著欲予苑裡閣較好、予逐家重新認捌這个所在、予干焦佇苑裡遮有的產業、文化通好保留落來，兩个人開始思考愛按怎做，予伊毋是干焦是一場社會運動爾爾，「苑裡掀海風」這个團隊也因為按呢成立矣。

結合返鄉青年、在地小農、編蓆的婦女，這个團隊佮其他的社會企業團體無仝，只要有心想欲予苑裡閣較好，認同團隊的理念，就會當是掀海風的人。

「苑裡掀海風」團隊嘛共責任擔起來，實際去行踏，行入去鄉鎮、行入去群眾內底，誠頂真去認捌、了解在地人的生活、苑裡的故事，而且閣透過序大人的分享，共苑裡的大細項代誌用講座、活動、小旅行各種型式來呈現，予逐家實實在在認捌苑裡、佮意苑裡！