第三十八集
來去庄跤教街舞

壹柒伍捌是一陣愛跳舞的大學生所組成的， 上早是由一陣台大的研究生開始，怹愛跳舞，嘛願意付出，發現大部份的偏鄉服務，攏是課業、電腦資訊等這款較實用的科目，真少有藝術性的項目，怹想欲種一粒種子釘根，予遮的囡仔嘛有機會享受跳舞的快樂，因為台大的社團允准外校的學生加入，對2015年開始，壹柒伍捌嘛漸漸發展到別間學校的系所，吸引各種無仝專長的同學鬥陣舉辦營隊，經驗也一直傳承落來，畢業出社會工作的學兄學姊，因為懷念少年時的熱情，也會轉來繼續貢獻，將這葩青春熱情一代一代傳承落去。