第三十五集
野臺繫在地辦桌

你敢有聽過，共咱全台灣少年的總舖師攏呼起來，逐家做伙用家己的專業，合作研發出一項一項，予你食了毋但感覺足好食，閣會使食了足安心的菜色，麭、飲料佮點心的辦桌咧？

其實這馬現代人已經真罕得食著「辦桌」，閣較毋免講是一改結合現代料理技術、食材佮創意的新型態料理。「野台繫」就是一陣來自各界的gâu人組成的團體，向望用各自的專業穿針引線，以熱情奉獻的心意，將在地的各種元素結合，量身打造「在地饗宴」。

這馬伊已經第三屆矣，參與的每一个gâu人，就算講有家己的餐廳愛顧，但是怹猶是堅持，閣較按怎無閒，嘛愛替野台繫研發有創意的新料理。怹的目的其實是想欲證明：共台灣文化佮料理做一个結合，改變一般人對台灣菜的印象，證明講咱台灣菜，嘛會當做出國際級的水準。

嘛因為按呢，這三年來，怹除了是菜色不斷的創新，怹新加入的總舖師佮報名的人數，是愈來愈濟。今年總算徙到台北的大稻埕，予蹛佇北部的朋友，嘛會當食著創新的辦桌菜色。原來社會若是想欲對正面的方向行去，靠的毋是競爭，是合作，野台繫這幾年堅持咧做的代誌，就是上好的證明。