第三十三集
行讀彰化趣

真濟人定定攏咧思考『旅行的意義』是啥物。佇365工無閒刺刺的日子内底，『旅行』是大部份人想著會使予家己喘一口氣的方式。有一位彰化在地的少年人，將伊佇台北旅行社的工作經驗，紮轉來故鄉，想要起造無仝款的旅行方式，予來到彰化旅行的遊客，毋但是行行看看，閣會想欲行踏這个予怹日思夢想的彰化。

一个人的力量無夠，所以伊透過讀冊會的群聚效益，揣著一陣仝興趣的工作伴，有人對廟寺的熱情佮熟似，就算講三點鐘嘛講袂煞；對彰化的愛佮疼痛，有人去學習彰化地區的生態知識；有人是咧教手工製作的課程，結合在地的文化特色創造唯一的伴手；嘛有人離開教育事業，接手厝內的傳統產業，對頭學習、釘根暴穎，保留工藝價值，怹起造出多元的小旅行模式。

目前有16條小旅行路線，會使滿足大部份無仝需求的遊客，而且每一冬攏閣咧增加新的路線，欲予民眾有閣較濟的體驗。上重要的是，逐年的正元初一、十五元宵，怹攏會舉辦免費的導覽『彰化四城門小旅行』做伙攑鼓仔燈夜巡彰化古城，歡迎逐家相招來彰化行踏。

怹嘛將這款力量，傳到四箍圍仔的鄉鎮，對講座分享、讀冊會、行讀到體驗，怹講：『就是予彰化人更加認捌彰化，予家己閣較熟似家己』，予家己了解家己，就會使予外來的朋友感受著『阮的日常就是對你上好的款待』。