第三十二集
戲人生 夢青春

講著搬戲，你會想著啥物？是佇台頂開足濟精神和時間，展現出上好的一面的演員？抑是佇台跤因為感動的劇情，看甲目屎流目屎滴的觀眾？抑是美麗的舞台、台頂的光閃閃爍爍？

戲劇使人迷戀，當演員咧排練和演出的時陣，會使借用另外一個人的身份來體驗人生。觀眾嘛會當因為看戲，和演員做伙享受這个時間共同創造的記持。

佇劇團打拚的人，只是欲堅持做一件代誌，就是將藝術人文的精神，繼續湠落去。

像青藝盟劇團，怹毋但陪伴高中生學戲，也開始用搬戲的方式，牽引一寡需要陪伴的囡仔長大。

阮劇團怹轉來故鄉嘉義，搬家己的戲。偏鄉演出，陪囡仔眠夢；社團教學，予青少年有夢；做台語戲，行向家己的理想和向望。

雞屎藤舞蹈劇場，結合舞蹈和戲劇，展現草地的個性，向望建立有府城文化，和台灣特色的舞蹈和劇場表演。

佇台灣，大大小小的劇團，加加起來上無上百個，毋管是為著傳承傳統文化，抑是為著個人的興趣、向望，怹用青春，創作屬於家己的夢。