第三十集
社區夢想家

社區是真好觀察日常生活的所在，佗一戶人家咧拍囡仔、佗一戶人家咧煮食，透過聲音、氣味，就連鞭會當知影社區所發生的大細項代誌。但是這幾年來社區人口高齡化，少年人離開家鄉食頭路，所以見若講著『社區』，就會共『老人』聯想做伙。嘛因為按呢，有一寡少年人，看著社區漸漸仔有欲蔫去的感覺，怹團結逐家的力量，對一个人到一陣人，想欲予社區有無仝的面貌，所以毋管上山落海，攏通看著少年人咧為社區的發展拍拼。

佇迷人的花蓮七星潭，有人咧推動食魚教育，用講故事、體驗活動，予逐家認捌魚仔，了解海洋生態，嘛教逐家魚仔按怎食上鮮、上合味。佇南投竹山、鹿谷，嘛有一陣少年人轉去到故鄉，對種有機天然的食物開始，招逐家做伙共無咧用的空間，改做農產品展示區抑是辦活動的空間。離開農村來到台北，有人用設計思考的方法論，對討論、執行佮失敗的過程中，走揣投入社區的新模式，培養少年的團隊，予怹佇未來會當延伸對無仝的社區去做服務。