第三集
發落文化的青春夢
若講著臺灣辦桌的精神，就是愛「豐沛」，愛予人客食予歡喜，就是咱臺灣話所講的「大碗大箸」，這也代表著主人家的熱情，是佇當初的農業社會，一款人佮人之間，互相鬥跤手、相放伴的感情緣，是臺灣文化內底，一个真重要的部份。
那陣的總鋪師，用in一世人的時間，發展出濟濟時行的手路菜。辦桌時陣，食好料、看戲、耍tshit 迌物仔，也對真濟的老大人來講，是細漢時代上快樂的記持。
發落文化工作室，是由一陣平均30歲的少年人來所組的，in上起先成立的目的，就是欲予一般的民眾，通有機會來看遮幼路的傳統、文化佮藝術。
這陣人內底有文化工作者、翕影師、設計師。佇網路頂，創出真濟有古早味，抑毋過用現代技術包裝，流行的廣告，予一般的少年人，也感覺講其實傳統文化嘛袂離咱足遠。
有這陣專業人士來鬥拍拼，發落文化 tshua 咱行入時間的磅空，準備來體會古早時代，生活的一點一滴、糖甘蜜甜。
自辦桌來出發，in向望咱臺灣人，通用心去感受，家己跤踏的這片土地，有偌爾濟所當咧搬演的藝術文化。上媠的風景無佇咧國外，只要咱願意出去行行咧，所搪著的人，發生的代誌，攏會當成做是咱的人生路程當中，上蓋有意義的故事。
|
