第二十九集
Story Wear零擲捒時尚

恁敢知影？全世界除了石油化工業以外，對環境汙染上嚴重的，就是時行的服裝產業。原來咱每一工穿咧身軀頂，抑是怹咧店賣的媠媠的衫，攏會汙染環境，造成全球暖化。嘛因為按呢，國際上早就已經有永續時尚、綠色時尚抑是講循環經濟的研究，已經幾若年矣；只是佇咱台灣，大部份的人較毋知影，猶毋過這幾年開始有一寡少年人發覺著這个國際趨勢，開始成立親像「Story wear」這款零廢棄的服裝品牌，就是欲予台灣加入這場全球的時尚革命。

佇台灣，親像「Story wear」抑是阿福、阿多有業務、設計、行銷、策展這寡專業，為地球拍拚的組織，其實猶有真濟，只是規模攏無大，社會影響力嘛猶有發揮的空間。毋過俗諺講了好：「頭過身著過。」既然這逝時尚改革的路已經開始矣，就代表這款的概念會繼續行向希望的終點，完成時尚改革的使命，證明台灣的時尚業毋但會使設計出國際級的好作品，嘛會使做出對地球較無傷害的好產品。