第二十三集
雞屎藤舞蹈劇場

台灣有一種野草定定拋佇樹仔、草埔仔抑是石頭縫，伊的名號做雞屎藤，會號這个名就是因為伊的葉仔若挼挼咧，會有雞屎的臭味。雞屎藤嘛是一味草藥，是早前腹肚疼的時定用的偏方，台南有一个劇團，就號做「雞屎藤舞蹈劇場」，希望逐家看怹的表演，會當共無爽快的攏放袂記。雞屎藤舞蹈劇場，聽名就知影充滿性命力，舞團自1991年由許春香老師組團華夏青少年舞團，對70年代厝內的客廳開始跳舞，2002年改名雞屎藤舞蹈劇場。怹的舞者平均入團10幾冬，後來編劇陳慧勻佮導演胡紫雲對英國留學轉來，共佇英國學的戲劇訓練紮轉來，予團員毋但會使跳舞，閣會使做舞台劇，表演的方式愈來愈豐富。雞屎藤共台灣歷史、台灣文學佮生活文化，攏展現佇咧的表演內底，嘛做出誠濟有府城底蒂的作品。