第十一集
聚樂邦的青春夢
信義區，予你的印象是啥？敢是懸樓？抑是人山人海的百貨公司？或者是異國料理餐廳？其實這寡物件攏無毋著，但是伊的全貌，煞毋是干焦按呢。成立三冬的聚樂邦，聚樂邦，這个名就是做伙𨑨迌快樂的城邦，in不斷透過遊戲佮社區營造，欲予逐家知影信義區除了繁華，嘛有真少人知的文化。
聚樂邦成立三冬，駐點佇信義區，創辦人吳亞軒、林志育攏有無仝的任務，用社會設計的方法，結合遊戲佮文化議題，現此時已經推出真濟款實境遊戲，嘛予閣較濟人對𨑨迌內底，發現信義區的歷史佮美景。
in甚至佮在地文史工作者合作導覽，結合力量，做伙找出信義區的原貌，一合作就是三冬過矣。甚至定有學員講，若無來耍遊戲，可能一世人都毋知影信義區有這寡面貌。
三冬落來，聚樂邦捌經過足濟改失敗，但是in一直咧修正方法，才會當行到今仔日，雖罔夢想猶未完成，但是會當確定的是，in當咧行向心中的路。
|
