第十集
坪林茶鄉的青春夢
國道五號雪山磅空猶未開進前，對台北到宜蘭這段路著駛兩三點鐘，中間的坪林過去是遊客落車吃飯、歇睏的好所在，猶閣是翡翠水庫的水源保護區，嘛是做包種茶上出名的茶鄉。遮有世代相傳的茶園和做茶技術，但是嘛因為水源保護區限制發展，加上國道五號通車了後，大大影響坪林的觀光和產業。毋過佇遮有真濟人繼續咧拍拚，有少年輩的茶農轉來做茶，有外地的少年家因為愛這塊土地，為遮做代誌。有人做在地旅行規劃，有人做環境教育，in佇坪林茶鄉種落家己的青春夢，為著欲共坪林的媠、包種茶的清芳繼續傳落去，坪林遮的少年家，無分你是在地人抑是外地來的，逐家相伨組織起來，會當獨立分工，嘛會當共同合作。
|
